Sehlopha sa litsebi tsa bophelo ba kelello ho hlaha naheng ea Amerika tlasa lenane la mafu a Kelello (Mental Health and Deployment Readiness), se thakhotse thupelo ea bophelo bo botle ba kelello Setsing sa Bophelo sa Sesole sa Lesotho ka la 27 Pherekhong 2025, Motebong oa Sesole oa Makoanyane.
Sepheeo sa thupelo ena ke ho tlo tšoella setsi sa bophelo sa Sesole sa Lesotho le bo- mphato oa bona tšebetsong litabeng tsa bophelo bo botle ba kelello ’me mafapha a lebelletsoeng ho imona menoana ka thupelo ena ke Setsi sa bophelo sa Sesole sa Lesotho (Makoanyane Military Health Services), karolo ea Mabotho ka ho fapakana ka har’a Sesole le setsi sa kokelo ea mufu a kelello (Mohlomi Hospital).
Mafapha ao thupelo e simollotseng ka ona ka bakoetlisuoa ba mashome a mabeli a metso e mehlano (25) a Sesole sa Lesotho a kenyellelitse Sepetlele sa Sasole (Makoanyane Military Hospital), Sekolo sa Koetliso sa Sesole (Military Training Institute), Sepolesa sa Sesole (Military Police), Lebotho la pele (11 Inf Bn), Lebotho la Bobeli (12 Inf Bn) le Lebotho la Boraro (13 Inf Bn).
Lebitsong la Molaoli oa Sesole sa Lesotho, Major General (Maj Gen) Ramanka Mokaloba o lebohile ntlo ea boemeli ba naha ea Amerika Lesotho ka ho lula e hlomella Sesole sa Lesotho ka litsebo. Maj Gen. Mokaloba a lebohela boohle ba kenetseng thupelo. A re e se eka lithupelo tsa mofuta 'ona li ka ba teng ka bongata.
“Ke le laela ho botsa haholo nakong ena ea thupelo ena ho ba seo se tla thusa haholo ha ho etsoa likhothaletso tse tla bopa leano la naha la Tšireletso (National Security Policy) le tla thusa ho arabela taba ea Tšireletso ea motho (Human Security),” Ke Maj Gen Mokaloba eo ha a laea ba kenetseng thupelo eo.
Lebitsong la boemeli ba ntlo ea America Lesotho, ea ts’oereng molepo e le Motlatsi oa Moemeli monghali Peter Green o lebohile Molaoli oa Sesole sa Lesotho Lieutenant General Mojalefa Letsoela ka boikarabello boo a bo fileng Maj Gen. Mokaloba ho bona hore thupelo eo e ea etsahala. A re ke tlotla hore ebe bosebeletsi ba setsi sa bophelo sa Sesole, bo amohetse ho kenela thupelo ena.
“Re le boemeli ba Amerika Lesotho re itšetlehile ho tšireletso ea naha ea Lesotho bakeng sa tšireletso le polokeho ea rona, ke ka hona re khethileng ho matlafatsa tšireletso ena ka litsebo,” o rialo monghali Green ha a phethela.
Lebitsong la Sepetlele sa Sesole sa Lesotho Colonel Phatela Mosheshe o lebohile mpho ea tsebo e fanoeng ke naha ea America ho Sepetlele sa Sesole sa Lesotho le bo-mphato oa sona tšebetsong. A re bohle ba kenetseng thupelo eo ba ikitlaetse ho re thupelo eo e tle e fihlele sepheo sa eona.
Ea eteletseng pele sehlopha sa litsebi tsa bophelo bo botle ba kelello Major (Maj) Francis Ugoh o itse ba bile Lesotho mona Ngoahola ka sepheo se tšoanang sa ho arolelana litsebo le Sesole sa Lesotho. A hlalosa hore ba ithutile tse molemo nakong e fetileng, ke ka hoo ba boileng sekoele.
Maj. Ugoh a re e le Masole a Amerika ba ananela le ho hlompha monyetla oo ba o fumaneng hape ho re eena le litsebi tsa habo ba boele ba tlo thakelana ka malebela karolong ea bophelo bo botle ba kelello le bohle ba kenetseng thupelo.
Ea buileng ho tsoa Lefapheng la Bophelo la Sesole sa Lesotho Major (Maj) Seratileng Nchephe o itse lefatše le tobane le qholotso ea litaba tsa bophelo ba kelello. A tiisa ho re Sesole ke karolo ea lefatše ka hona se lokela ho tšoenyeha. A re ha ba ka tšoarana ka matsoho e le basebeletsi ba tsa bophelo le bohle ba nang le kobo ea bohali ba ka hlola phepetso ena e tobileng lefatše.
Litaba le Litšoantšo ka Lcpl Lebona
