E bile thabo le monyaka, ea e ba lehlana-hlana la motima hlaha ha mabotho a Sesole a fapakaneng a qothisana lehlokoa ka litlholisano tsa mabelo e le ho ketekela letsatsi la Machaba la Lipapali tsa Sesole The International Military Sports Council (CISM) tse tšoaroang lefatše ka bophara. Tsena li etsahetse ka la 22 Tlhakubele 2025, Liahelong tsa Sesole sa Lesotho Makoanyane.

 

Letsatsi le na le keteketsoe ka litlholisano tsa lebelo la bolelele ba likilo-mithara tse 21(21KM) ho tloha Qiloane Thaba-Bosiu ho ea Liahelong tsa Sesole Makoanyane, moo litsi tse fapakaneng ka hare ho Sesole li ileng a nkhisetsana mahafi, ’me sehlopha sa basali ho tsoa Lebothong la Matšolo a ikhethang la Sesole sa Lesotho (Special Forces), se ileng sa tsoa tjaro-ea-mabonoa, sa ikhapela boemo ba pele mokhahlelong oa lihlopha tsa basali ha mokhahlelong oa banna Lebotho la bobeli la Sesole (12 Infantry Battalion) le ile la ikhapela boemo ba pele.

 

Mokhahlelong oa Liofisiri, ea ileng a thoba ka khaka a nka boemo ba pele e bile Major Tlhoriso Limo a lateloa ke Second Lieutenant Moshoeshoe Mpokathi boemong ba bobeli, ha boemong ba bararo e bile Captain Lehlohonolo Motsumi. Mokhahlelong o mong e bile oa li Non-Commissioned Officer (NCO) moo Lance Corporal (Lcpl) Leeto Mokuoane a ileng a ikhapela boemo ba pele a hlahloangoa ke Lcpl Khauta Sakoane ka boemo ba bobeli ’me boemo ba boraro e bile Cpl Motebang Tšeole.

Masole a ipabotseng ka bongoe mokhahlelong oa Masole a Basali e bile Pvt Nkhopoleng Mekhoa boemong ba pele, a lateloa ke Pvt Puseletso Nkisi ka boemo ba bobeli ha oa boraro e bile Pvt ’Mamethe Makhotla. Mokhahlelong oa banna ka bongoe Pvt Thabiso Makhabeng o ile a tsoa tjaro-ea-mabonoa a hapa boemo ba pele, a lateloa ke Pvt Lehlohonolo Janki ka boemo ba bobeli, boemong ba boraro Pvt Tumelo Mohapi.

 

Molaoli oa Sesole Lieutenant General (Lt Gen) Mojalefa Letsoela, Liofisiri, Masole, litho tsa Lekala la Tsireletso, Setsi sa Pokello ea Lekhetho Lesotho ba neng ba sa kenela litlholisano, ba etelletsoe pele ke Sehlopha sa liphala sa Sesole sa Lesotho, ba ile a keteka ka motsamao o potlakileng ho tloha Smith Dam, Ha Leqele ho ea Liahelong tsa Sesole Makoanyane.

 

Molaoli oa Sesole sa Lesotho Lt Gen Letsoela o lebohile bohle ba kentseng letsoho ho bona hore mabelo a tsamaile ka katleho le bokhabane, a bontša ha taba eo e le tlotla e kholo haholo hore e be ba tlotla le ho abela Masole likhau ka mosebetsi oo ba o entseng oa ho matha.

Lt Gen Letsoela o bontšitse hore selekane sa bona le likhoebo mesebetsing eo ba e entseng ho Sesole e bolela ntho e kholo haholo e leng kamohelo ka hare ho sechaba ’me ba ea ipiletsa ho Bahoebi hore ba etse joalo ka mehla. A boela a leboha Molaoli ea ka Sehloohong oa lipapali tsa Sesole Brigadier (Brig) Motontolo Rakhoro le komiti ea habo ho etsa mosebetsi oo ho fihlela phethahatsong, a bontša hore ba entse mosebetsi oo ka tlhompho ba ntse ba hopola boitlamo ba bona hore ke Sesole sa Sechaba.

 

Molaoli ea ka Sehloohong oa lipapali tsa Sesole (Lesotho Defence Force Military Sports Council) Brig Rakhoro o bontšitse hore ka 1848 ka mor’a ntoa ea Bobeli ea lefatše, linaha li ile tsa ikeletsa hore li kopane ka mokhoa oa lipapali sepheeo e le ho tlisa Khotso mabothong a hlometseng ka mokhoa oa lipapali ho latela lepetjo la bona le reng ho bopa setsoalle lipapaling.

 

“Re hopola ka hloko mantsoe a bohlale a reng Lesole le sa koetlang ke sera ho Naha ea bo lona, lipapali li etsa ’mele o phetseng hantle le kelello e nahanang kapele, motho ea lulang a koetla o lula a phetse hantle,” ho rialo Brig Rakhoro.

Ha a tsoela-pele, Brig Rakhoro o botšitse hore lipapali li etsa motho ea hlomphang, a re sebapali se lokela e be motho ea hlomphang hobane ka hare ho papali ho na le melao le melaoana e tsamaisang hore qetellong ho be le mohloli, a bontša hore motho ea se nang hlompho ha a tsoelelle lipapaling ka ha o sitoa ho ikamahanya le melao e tsamaisang lipapali.

Ha a lihella likhala Brig Rakhoro o lebohile bohle ba bileng teng, ka ha boteng ba bona bo ba fa morolo lipapaling tsa bona, a boela a leboha bafani ka mosebetsi oa bona o khethehileng ekasitana le Masole ka boitelo ba bona lipapaling tsena.

 

Ea emetseng Mekaubere ea mabelo a Sesole sa Lesotho, Colonel (Col) Majone Leshoele o lebohile Molaoli oa Sesole sa Lesotho ka memo eo ba e fuoeng e le mekaubere ho tla boha lipapali. A boela a tšepisa Lt Gen Letsoela hore e ntse e le Masole a taolong.

Ha a bua le limathi o bontšitse hore lebelo le hloka motho ea sebete, a re boitelo boo a bo boneng le boitšoaro bo se fele empa ba tsoele-pele ho itšoara hantle ka ha boitšoaro e le tšiea ea bohlokoa lipapaling le ka har’a Sesole.

 

Col Leshoele a eketsa a re se ba thusang e le Masole ho etsa tsena tsohle ke boitšoaro bo botle (discipline), a re monate oa Sesole ke hore ba ea laeloa ha ba etse ntho hobane ba rata, ba etsa hobane ba laetsoe ka hona taba ena e ba thusa hore ebe ha ba tšoane le batho bao eseng Masole.

Lebitsong la batsehetsi/bafani, Mookameli oa mokhatlo oa Maseru City Run Mohlomphehi Sam Ts'oinyane Rapapa o itse ba se ba e ntse qeto hore ba fe Masole a ipabotseng monyetla hore ba be teng lebelong la Maseru City Run ba be ba fumane litekete tsa mahala lebelong leo.

Mohlomphehi Rapapa o bontšitse hore lipapali li litšenyehelo haholo ’me Naha e entse molao hore mohoebi ha a ka tšehetsa lipapali o tla fokoletsoa lekhetho. A re o khokhaletsa bahoebi ho hlahisa litokomane tsa bona, Litsing tsa litšebeletso tsa Lekhetho hore ba fokoletsoe likhafa ka ha ba kentse letsoho lipapaling.

 

Ha a qetella litaba tsa hae Mohlomphehi Rapapa o khothalelitse limathi hore ba se khathale matla, lebelo ke la methaka ha le fele. A bontša hore mabelo a etsa motho ea nang le tlhompho a bile a tletse morolo, a boela a re mabelo a tlisa le ntlafalo ea moruo ka hare ho Naha.

Mookameli oa Komisi ea Lipapali le Boithapollo Lesotho Mohlomphehi Litšitso Motšeremeli, o bontšitse hore e le Komisi ea lipapali ba motlotlo hore e be Molaoli oa Sesole sa Lesotho o lumella hore e be ho na le papali e kana eo ba e elang hloko.

 

“Re le Komisi ea lipapali ka hare ho Naha ea Lesotho re o tšepisa hore re tlo tsamaea lehlakoreng la hau, re tlo tsamaea pela hau re u tšehelitse haholo mosebetsing ona oo u o etsetsang ’Muso oa Lesotho,” ho rialo mohlomphehi Motšeremeli.

 

O bontšitse hore Komisi ea habo ea lipapali e entse selekane le Lefapha la Sesole la lipapali hore ba tlo aha lebala la ho sesa le mabala a mang a mangata. A phethela ka ho ipiletsa ho bafani ho kenya letsoho lipapaling ba fetole sebopeho sa Naha ea Lesotho etsoe lipapali e se boitlhabollo feela, ebile ke boipheliso.

 

Litlholisano tsena li ne li tšehelitsoe ke litsi le likhoebo tse latelang: Lekala la Tšireletso, Mokhatlo o Moholo oa lipapali tsa Li-Olympic (Lesotho National Olympic Committee), Setsi sa Pokello ea Lekhetho, Alliance Insurance, Mountain Kingdom Drops, Maseru City Run, Eagles Trading le Print Corps.

 

Mokhatlo ona oa Machaba a kopaneng ke mokhatlo o reretsoeng ho aha bonngoe le boiketlo ka hare ho Sesole. Mokhatlo o na o thehiloe ka la 18 Hlakola 1948 ’me esale o ketekoa selemo le selemo ho tloha o thehiloe.

   

Litaba ka Intern Lefu

Litšoantšo ka Lcpl Hlabisi le Pvt ’Mofu